កណ្តាល៖ អធិការនៃអធិការដ្ឋាននគរបាលក្រុងតាខ្មៅ លោកវរសេនីយ៍ឯក យី វណ្ណដា បានបញ្ជាក់ប្រាប់ EAC news ឱ្យដឹងថា កម្លាំងនគរបាលកំពុងតែសាងសង់លំនៅឋានជាបណ្តោះអាសន្នដល់ពលរដ្ឋរងគ្រោះដោយសារការបាក់ច្រាំងព្រែកថី ត្រង់ស្ពានទី៤ តាមកំណាត់ផ្លូវជាតិលេខ២១A ស្ថិតក្នុងសង្កាត់រកាខ្ពស់ ក្រុងតាខ្មៅ ខេត្តកណ្តាល។

បើតាមលោកអធិការនៃអធិការដ្ឋាននគរបាលក្រុងតាខ្មៅ អាជ្ញាធរកំពុងតែដុតដៃដុតជើងសាងសង់លំនៅឋានប្រមាណជាង ៣០ខ្នងជូនពលរដ្ឋប្រមាណជាង ៧០គ្រួសារ ដោយមានទាំងបន្ទប់ទឹក។

លោកវរសេនីយ៍ឯក យី វណ្ណដា បានបញ្ជាក់ថា៖ «លោកអភិបាលខេត្តកំពុងតែឱ្យក្រុមការងារសាងសង់ផ្ទះបណ្តោះអាសន្នជូនពួកគាត់»។

លោកបន្តថា ផ្ទះដែលសាងសង់ជាបណ្តោះអាសន្ននោះគឺស្ថិតនៅប្រវែងចម្ងាយប្រមាណ ៥០០ម៉ែត្រពីផ្ទះពលរដ្ឋដែលរុះរើបញ្ជៀសពីការបាក់ច្រាំងនោះ។

លោកវរសេនីយ៍ឯក យី វណ្ណដា បានគូសបញ្ជាក់ថា ករណីបាក់ច្រាំងព្រែកនៅក្នុងសង្កាត់រកាខ្ពស់ ក្រុងតាខ្មៅ ខេត្តកណ្តាល បានកើតឡើងថ្ងៃទី១៦ ខែមករា ឆ្នាំ២០២៣ ដែលបណ្តាលឱ្យផ្ទះចំនួន៦ បានបាក់ស្រុតចូលទៅក្នុងទឹកខូចខាតទាំងស្រុង ហើយចំនួន ២៧ខ្នងទៀត ត្រូវបានម្ចាស់ផ្ទះស្ម័គ្រចិត្តរុះរើទាន់ពេល។

ករណីបាក់ស្រុតផ្ទះពលរដ្ឋរស់នៅតាមព្រែកថីនេះ ត្រូវបានលោកវរសេនីយ៍ឯក យី វណ្ណដា អះអាងថាបណ្តាលមកពីទឹកហូរខ្លាំង ដែលហូរពីសណ្តព្រែកត្នោត និងពីកំពង់ស្ពឺ នាំឱ្យហូរច្រោះដី៕